Un Real Uviéu llaráu de baxes y vueltu a castigar pola mala suerte de les lesiones, con Edu Cortina, que se mancó nel calentamientu cuando diba ser de la partida, cayó elimináu esta nueche nel Carlos Tartiere énte’l CD Numancia en Copa del Rei.
El conxuntu uviedista, que formó colos menos habituales, entró tarde al partíu énte un CD Numancia que s’adelantó a los venti minutos de partíu col gol que, a lo postrero, diba da-y el trunfu a los numantinos. El peligru n’ataque del Real Uviéu tuvo nome propiu, coles internaes de Yeboah en banda, que punxo a prueba dos veces siguíes a Aitor Fernández, primero con un disparu qu’aparó’l meta sorianu, y de siguío, nel segundu palu, volviendo afrellase contra’l porteru visitante. La última ocasión de la primer metá llegó en botes de Folch, con un llanzamientu dende la frontal, que marchó esviáu.
Na segunda metá, y dando entrada a Forlín por Asier, el Real Uviéu aumentó la posesión de balón, y la presencia n’ataque, volviendo a protagonizar Yeboah una llegada rápida per banda esquierda qu’Aitor Fernández unvió a córner. Poco depués diba llegar el valtamientu de Folch nel área, nun penalti que fallaba Miguel Linares, unviando’l llanzamientu altu.
L’afición uviedista arropó al so equipu, que lo intentó hasta’l final, ensin ser quién a empatar el partíu, y quedó elimináu polo tanto de la competición del KO. L’entrenamientu siguiente va ser mañana, dende les 10:30 h, n’El Requexón.
