Con cambeos obligaos poles baxes por sanción y dalgún xugador tocáu con procesu víricu incluyíu, la gran novedá nel once titular de Rozada yera Javi Mier formando con Edu Cortina y Jimmy para midise a un Málaga énte'l que tamién entraba Mossa nel llateral, con Christian pasando al centru de la zaga pola ausencia d'Arribas. Menos públicu del habitual pol desacertáu horariu coincidente cola Cabalgata de Reyes, pero con too y con eso, munchos pequeños averar al Tartiere onde nel descansu pudieron saludar a los Reis Magos d'Oriente.
Empezó'l partíu con unos primeros minutos nos que'l Málaga facíase dueñu del balón pero'l Real Oviedo nun pasaba apuros. La mancadura de Edu Cortina provocó la entrada de Lolo a los quince minutos de partíu. Nel segundu acercamientu oviedista, llegó'l gol. Sangalli nuna bona xugada individual, chutó tres la conducción y dalgún regate, y anotó el primer gol del alcuentru. El guión siguió siendo'l mesmu, y primero Bárcenas y depués Javi Mier dispunxeron de los dos causes más clares p'ampliar ventaya antes de descansu.
Yá na segunda metá salió fuerte'l Real Oviedo en busca del segundu, pero ensin aciertu. Nunu de los acercamientos del Málaga, concretamente nuna xugada a balón paráu, una mano na área con revisión de VAR incluyida terminó en penalty, que'l conxuntu andaluz convirtió nel empate. Entró Ibra dende'l banquín, y el Real Oviedo tuvo dalguna ocasión más p'anotar el segundu, pero la falta d'aciertu dexó'l marcador en tables. Nin cola entrada de Obeng y siete minutos d'agregu pudo quedase l'equipu oviedista cola victoria.
El martes va tornar al trabayu'l Real Oviedo en doble sesión d'entrenamientu
