El Real Uviéu celebraba’l partíu del so 92.u aniversariu con unos díes d’antelación. El conxuntu uviedista volvió ganar, y fíxolo cinco xornaes depués del so últimu trunfu, nel Carlos Tartiere, énte la so afición y na celebración del 92.u aniversariu del club azul, onde los xugadores llucieron una camiseta especial nel calentamientu, y a la so salida al terrén de xuegu, acompañaos d’otros tantos de los abonaos más antiguos de la entidá.
Anquela, entá sancionáu, viose obligáu a xugar con Aarón en punta pola falta de Linares y Toché, y con Cotugno nel llateral sustituyendo al tamién sancionáu Diegui Johannesson. Na primer parte’l Real Uviéu empezó con dificultaes na creación de peligru, énte un Granada que llegaba más a la portería d’Alfonso, hasta afrellar un balón en llargueru y anotar depués el cero a un, obra de Kunde, nun refugue qu’empalaba na frontal del área. El conxuntu uviedista foi quién a llograr l’empate, cuatro minutos depués, nuna xugada que lluchó Carlos Hernández hasta’l final, pa sacar el balón de les manes de Javi Varas y que Forlín namás tuviere qu’emburriar.
Algamábase’l descansu col un a un, y el Real Uviéu salía con más fuercia y mayor pegada n’ataque. Fabbrini tuvo la primera nun centru de Saúl dende la esquierda, y Aarón tamién la tuvo nuna contra, depués de bona recuperación de Mariga y pase al espaciu, pero tiró fuera. De nuevo en balón paráu túvola l’equipu d’Anquela, pero’l remate ente Christian y Mariga marchó fuera. Movía bancu’l Real Uviéu, y Steven anotaba cuasimente nel primer balón que tocaba, a pase de Mossa n’área. Defendióse’l Real Uviéu hasta’l final del partíu, énte un Granada que buscó averase, pero atopóse de contino con un gran trabayu defensivu del conxuntu uviedista.
Una victoria nueva del Real Uviéu que dexa cortar la mala racha, dándo-y amás una allegría nun día especial a la so afición. L’equipu va volver entamar los entrenamientos el martes, dende les 10:30 hores, n’El Requexón.
