Y la primer victoria de la temporada llegó énte'l Sporting de Xixón, nun derbi nel que'l Real Oviedo sacó tol so arguyu, valor y garra pa vencer énte'l so eternu rival.
Cola entrada nel once de Christian Fernández, Mossa, Nahuel y Blanco Leschuk con respectu al partíu de la pasada fin de selmana en Albacete, los de Ziganda encararon el primer derbi de la temporada. La primer metá, na que'l conxuntu oviedista tuvo bien ordenáu en defensa y xeneró más accionesde peligru qu'el so rival, tuvo marcada pola intensidá que los dos equipos punxéron-y al partíu. Túvola Tejera a los pocos minutos del pitíu inicial, con un disparu dende la frontera que se foi percima de la portería defendida por Mariño. Dambos equipos se fuéron repartiendo la posesión, con tramos nos que'l Real Oviedo aplicóse en defensa y manió a los atacantes del Sporting. Nahuel, Sangalli, Obeng y Blanco Leschuk cafiaben a la zaga visitante, con acciones de peligru que nun llograben materializar. Precisamente, nuna combinación ente los homes de les bandes llegó'l penalti pal Real Oviedo, de Javi Fueu sobre Marco Sangalli. Sergio Tejera anotó dende los once metros. Col unu a cero llegóse al descansu.
Tres el pasu por vestuarios, los visitantes ficiéronse col control del xuegu, atopándose enfrente a un Real Oviedo que nun-yos concedió ocasión de xenerar peligru sobre la meta de Femenías. Ziganda dio entrada a Borja Sánchez y Javi Mier, buscando refrescu na zona ofensiva carbayona. Nel tramu final del partíu Diegui, Mujica y Carlos Hernández fixeron lo propio pa contribuyir al trabayu del equipu y consiguir los trés puntos.
El derbi vuelve tiñise d'azul y refuerza les sensaciones de los carbayones, que mañana van volver al trabayu pa preparar el partíu de la próxima fin de selmana énte el Girona.
