Una de les victories que meyor saben, pol esfuerciu y el trabayu d’un Real Uviéu que se sobrepunxo a tolos inconvenientes pa sumar trés puntos nel Viejo Nervión.
Anquela repitió alliniación, pero Yeboah foi espulsáu por tarxeta colorada directa a los quince minutos de partíu. El Real Uviéu quedaba con diez, pero aguantó mecha. Alfonso intervieno en dos ocasiones pa tornar el peligru, y Rocha probó suerte con un llanzamientu de lloñe que marchó esviáu. El gol diba llegar a la media hora de partíu, nun llanzamientu de falta directu que David Rocha enchufaba pela escuadra. Linares tuvo la postrera de la primer metá, pero’l meta arrebañó-y l’esféricu de les botes cuando yá ganare l’ún contra ún.
Tres del descansu’l Sevilla Atléticu aumentó’l control del balón, pero’l Real Uviéu defendióse con seriedá y criteriu. Volvió ser protagonista Alfonso con dos bones paraes, y l’equipu esforcióse en defensa pa esbaratar los averamientos del filial sevillista. Tuvo’l segundu Linares, pero afrelló’l remate, a pase de Johannesson, en poste. Foi a diez minutos de final de partíu cuando’l colexáu Valdés Aller decretaba un penalti cometíu por Christian Fernández, qu’Alfonso arrebatía pa dexar los trés puntos en marcador del Real Uviéu.
Un trunfu seriu y trabayau que disfrutaron el centenar d’aficionaos desplazaos al partíu nel Viejo Nervión.
