El Real Uviéu namás llevó un puntu nuna nueche na que la victoria diba ser más que merecida, énte un CD Tenerife al que superó nel global del partíu, pero nel que faltó materializar dalguna ocasión más que sentenciare l’alcuentru, a pesar del arbitraxe.
Anquela introdució dos cambeos nel once, con Rocha y Mossa en cuenta de Pucko y Christian Fernández, y el Real Uviéu despachó una gran primer parte, con muncha seriedá defensiva, control de balón y oportunidaes. La primera cuando nun se cumpliere’l minutu de partíu, nuna llegada de Folch nel segundu palu, que, de primeres, remató alto’l centru de Mossa dende la esquierda. A los venti minutos d’alcuentru yera Saúl Berjón el que firmaba, con sellu de calidá, l’un a cero pal Real Uviéu batiendo con un control y toque maxistral al meta tinerfeñu nel ún contra ún. Toché tuvo’l segundu nun llanzamientu, cola derecha, que marchó raspiando’l poste. Aarón Ñíguez probó suerte en llanzamientu directu de falta, que’l porteru del Tenerife unvió a córner. La postrera primero del descansu foi de Cotugno, que probó suerte con un disparu potente dende la frontal, que’l porteru canariu aparó con apuros, y un claru penalti a Aarón, con coldazu de Raúl Cámara n’área, acabó ensin castigu que diba suponer la pena máxima dende los once metros.
Na segunda’l Real Uviéu salió a pol segundu y volvió tener una ocasión clara p’aumentar la ventaya en marcador, pero la lesión de Verdés y la entrada de Valentini condicionaron los primeros minutos del segundu tiempu. El Tenerife reforzó tamién l’once con un cambéu dende’l bancu, y aumentó la presencia n’ataque de la que pasaben los minutos. Juan Villar firmaba, nún de los pocos averamientos a la meta de Juan Carlos, un auténticu golazu, empalando de primeres un centru que supunxo l’empate a un en marcador, precedíu d’una falta clara a Toché que’l colexáu nun decretó. El Real Uviéu bregó hasta’l final, ensin llograr un premiu mayor qu’un empate, énte un Carlos Tartiere con mui bona entrada que despidió con aplausos a los sos xugadores y con enfadu al arbitraxe.
