Nin la calor nin la humedanza foron sida pa que’l Real Uviéu compitiere del principiu a la fin y llevare un puntu d’Almería.
Primero d’empezar el partíu llegó-y el primer contratiempu a Juan Antonio Anquela, que se vio obligáu a da-y entrada a Johannesson en cuentes d’Aarón, con molesties de la que calentaba. Arrincó’l partíu col Real Uviéu bien metíu protagonizando los dos primeros averamientos en botes de Johanneson. Primero nun centru a pase de Saúl al espaciu, qu’acabó nos guantes de René, y depués con un remate tres de pase de Toché que volvió atopase col meta local. Precisamente l’ariete uviedista diba tener la siguiente, con un pase en fondura de Saúl que ganaba en carrera a los dos centrales, pero remataba demasiao forciáu unviando fuera. Juan Carlos tuvo qu’intervenir nun bon disparu de los locales dende la frontal, y ensin más averamientos acabó la primer metá.
Na segunda, y ensin cambeos en nengún de los dos conxuntos, pero con señes yá de la cansera pola calor, Saúl Berjón abrió’l marcador con un gol bien guapu, a pase de Toché, que’l pichichi uviedista picaba la cuenta pa colar el balón percima de René. Saúl tuvo’l cero a dos na siguiente xugada, pero nun atinó col control nel área pequena. Poco-y duró l’allegría y la ventaya en marcador al equipu d’Anquela, que vio cómo’l Almería empataba trés minutos más tarde con un golazu, obra de Pozzo y imparable pa Juan Carlos. De toles maneres, y depués de dellos minutos nos que la posesión foi pa los locales, el Real Uviéu defendióse con seriedá y bregó a fondu pa evitar que los averamientos del Almería tuvieren premiu. Nos postreros compases del alcuentru llegaron les opciones más clares pa los uviedistes, depués de mover bancu Anquela. Un gran tiru de Saúl Berjón buscaba la escuadra, pero René atayó con una bona parada evitando’l segundu pa los azules. Toché tuvo la postrera y volvió afrellase col porteru local cuando diba rematar.
A la fin, repartu de puntos pa dambos conxuntos, con un bon Real Uviéu, al que namás-y faltó un pocu de fortuna pa sumar la primer victoria de la temporada.
