Xornada 16 de LaLiga Smartbank para'l Real Oviedo, que recibía nel NMR Carlos Tartiere al Alcorcón, nun choque que remató con repartida de puntos ente dambos equipos.
Nun partíu, nel que'l Cuco Ziganda punxo en tema un once formáu porFemenías, Juanjo Nieto, Arribas, Bolaño, Lucas; Sangalli, Edgar, Tejera, Borja Sánchez; Blanco Leschuk y Nahuel, les ocasiones y el dominiu fueron pa los azules, con un Alcorcón que nun-y punxo les coses nada fáciles al conxuntu de la capital del Principáu.
Na primer metá los visitantes salieron enchufados, teniendo unos minutos de xenerar peligru sobro la meta defendida por Femenías. El conxuntu madrilanu, bien ordenáu en defensa, cerró espacios al Real Oviedo, qu'adulces se foi faciendo col control del balón, xenerando xuegu per banda. Nahuel, tres un robu na salida de balón de la defensa alfarera, tuvo nes sos botes la primer acción de peligru clara sobro la portería visitante. Minutos más tarde, una bona combinación entre Nahuel y Sangalli,
que dexó'l balón en bandexa pal remate de Juanjo Nieto, acabó con un disparu a la madera del llateral oviedista. Na primer metá'l Alcorcón apenes xeneró ocasiones a el carbayones. Ensin goles nel lluminosu llegóse al descansu del choque.
Tres el pasu por vestuarios, el Alcorcón siguió intentándolo con acciones a la contra y tiros dende fora de la área, que fixeron a Femenías emplegase pa esbaratar el peligru visitante. El Real Oviedo siguió dándo-y continuidá al so xuegu, controlando la posesión y tratando d'abrir buecu ente llínees. Los de Ziganda volvieron demostrar una gran solidez defensiva, emplegándose a xeitu pa compensar los balones llargos del conxuntu madrilanu. Teúvola Tejera dende fora de la área, y minutos más tarde sería Borja Sánchez el que dispondría d'una ocasión clara p'abrir el marcador. Samuel Obeng sustituyó a Blanco Leschuk , nel minutu 63, Rodri Ríos a Borja Sánchez, nel 76 y finalmente Cedric y Javi Mier fueron los últimos cambeos Ziganda. Nel tramu final del choque, l'árbitru, en revisando'l VAR, señaló pena máxima pal Alcorcón. Anotaron los madrilanos, pero'l Real Oviedo nun-y perdió la cara al alcuentru, con un aceleríu final, nel que llegó'l gol de Sangalli, y onde los azules dispunxeron de delles ocasiones pa llevase'l partíu.
Suma un puntu nel so casillero el Real Oviedo, que dende mañana va trabayar nel choque del próximu domingu na Nova Creu Alta énte la CE Sabadell.
