El centru comercial Modoo foi l’escenariu de la presentación del proyectu nuevu Real Uviéu Kids, desenvueltu a comuña pola entidá y Proasur, que tien como protagonistes principales a los uviedistes más pequeños.
Trátase d’un espaciu diseñáu pa la diversión, l’ociu y el fomentu del uviedismu, onde poder celebrar cumpleaños, fiestes, talleres y toa clas d’eventos destinaos pa lo más pequeño de los nuestros aficionaos.
Nel actu tuvieron presentes el conseyeru de la entidá Fernando Corral Mestas y Javier Martínez, director de desenvolvimientu de negociu de Proasur, amás de Toché, que presentaron el proyectu y atendieron a los medios concentraos en Modoo, arropaos pol tol Conseyu d’Alministración, César Martín y Joaquín del Olmo.
Fernando Corral esplicaba que "ye un pasu más d’esti proyectu que’l Grupu Carso tien pal Real Uviéu. Un proyectu guapu y que nos ilusiona, que supón un pasu más na potenciación de la marca Real Uviéu y empobináu a los neños y neñes uviedistes. Desenvolviemos esti proyectu dende va dos años y va ver la lluz nunes selmanes. La idea ye averar entá más la marca a los pequeños".
Pela so parte, Tino Martínez, presidente de Proasur, esplicaba que "con esti proyectu queremos treslladar el deporte a un espaciu lúdicu, onde podamos inculca-yos a los neños valores como l’esfuerciu, el trabayu n’equipu y la potenciación d’habilidaes. Va haber una pista de mini fútbol y espacios tecnolóxicos; queríemos facer un espaciu onde, amás d’elementos tradicionales que tengan que ver col fútbol, tamién haya una parte importante de tecnoloxía. La idea ye que’l Real Uviéu pueda facer daqué pa que los neños vaigan empapándose de los valores que tien el fútbol. Esti espaciu va tar disponible a últimos de setiembre; del 18 a 22 aproximao, vamos facer una presentación de los xuegos y los espacios desque tean acabaos. Ta enfocáu pa neños y neñes ente 4 y 12 años, y amás de celebración de cumpleaños van facese más coses, con escueles y dalgún campamentu. Dirá desenvolviéndose nel futuru con más coses nel Carlos Tartiere", sentenciaba.
