El NMR Carlos Tartiere acoyó esta tarde una nueva xornada de La Liga Smartbank, na que'l Real Oviedo recibió al Rayo Vallecano, con repartida de puntos a la fin de los noventa minutos.
Coles novedaes de Carlos Hernández, Aribas y Mossa, respectu al once de la pasada fin de selmana en Girona, y portando les camisetes en sofitu al cáncer de mama, saltaron los de Ziganda al verde del feudu oviedista para vese les cares con unu de los equipos más fuertes de la categoría, como avisó'l técnicu navarru na previa del choque. Na primer parte, na que dambos equipos partieron la posesión de balón, el Real Oviedo amosó orde y solidez defensiva, teniendo nes botes de Borja Sánchez y Nahuel les ocasiones más clares del primer actu. Joan Femenías fizo una gran intervención para evitar el tantu de los madrileños. Tres el pasu por vestuarios, el Rayo Vallecano fízose col control de xuegu, torgando que'l conxuntu azul pudiera xenerar peligru sobre la meta visitante. Ziganda dio entrada a Aburjania, que debutó col Real Oviedo, a Viti y a Obeng, que tuvo nes sos botes la ocasión más clara del partíu, pero foi baltáu na área pola defensa rayista. Como na primer parte, la meta azul foi clave, con una bona espurrida a remate de la delantrera visitante.
Nuevu puntu nel casillero azul para un Real Oviedo que va volver al trabayu mañana para preparar el so próximu compromisu énte'l Leganés.
