La segunda cita de la pretemporada dexó nel NMR Carlos Tartiere un Real Oviedo– Mirandés, qu'acabó cola resultancia de 0-0 nel marcador, y mui bones sensaciones del equipu de Ziganda mientres los 90 minutos.
Con un once formáu por Femenías, Grippo, Arribas, Rodrigo, Juanjo Nieto, Javi Mier, Obeng, Viti Rozada, Borja, Tejera y Mossa saltaron los azules sobro'l verde del feudu oviedista, demostrando, dende los primeres compases del partíu, una gran solidez defensiva y llevando el pesu del partíu, con un gran númberu d'ocasiones de peligru sobro la meta defendida por Limones. Rodri y Borja Sánchez tuvieron les primeres del alcuentru, pero nun llograron materializales.Viti anotaría tres un refugue de Limones, pero'l colexáu determinó que s'atopaba en posición antireglamentaria. Cola resultancia de 0-0 llegóse al descansu.
Na segunda metá, na qu'a los quince minutos de xuegu Ziganda dio entrada a Javi Fdez, Johanesson, Vanderson, Gassan, Jimmy, Bolaño, Riki, Edu Cortina, Lucas y Ton Ripoll, los azules siguieron apoderando'l xuegu, con repartida d'ocasiones ente los dos equipos. La defensa azul tuvo daqué más de trabayu, desfízose del peligru xeneráu pol Mirandés, y siguiendo cola imaxe sólida demostrada na primer metá.
La primer plantiya va descansar mañana, volviendo al trabayu esti llunes, y va encarar la selmana preparando los sos dos últimos compromisos de pretemporada ante Ponferradina y Athletic Club.
