El Real Uviéu supo sufrir y sacar una victoria trabayada de la so visita al Artés Carrasco, nun partíu nel que Juan Antonio Anquela namás introdució un cambéu en comparanza cola última xornada, la entrada de Yeboah pol mancáu Aarón Ñíguez.
Empezó l’alcuentru col conxuntu uviedista bien metíu y los primeros averamientos con peligru. Trescurrieren cinco minutos de partíu cuando Linares nun atinaba nel control d’un pase en llargo, que lu dexaba solu énte Dorronsoro. El primer tantu uviedista diba llegar nel minutu 13, nun llanzamientu de córner de Saúl Berjón, que la punxo a Rocha na frontal, pa qu’anotare con un fuerte disparu directu a portería. Llegaba’l cero a un, y el segundu nun diba facese esperar demasiao. Obra de Miguel Linares, un centru dende la esquierda, otra vez de botes de Saúl Berjón, convertíalu’l capitán uviedista nel cero a dos pa dar más tranquilidá en marcador. Primero del descansu, Saúl intentólo dende lloñe, col meta local adelantáu, pero’l llanzamientu marchó esviáu al recibir falta.
Tres del descansu’l Lorca metió una marcha más n’ataque, pero ensin ser quién a poner n’apuros al conxuntu uviedista. La presión uviedista siguía funcionando, y Yeboah aprovechó un robu nel mediu’l campu pa picar el balón percima de Dorronsoro, pero’l meta llegó a tiempu p’atrapar l’esféricu. Linares tuvo’l terceru, nuna contra na que foi quién a superar a Dorronsoro, pero nel siguiente control, yá col meta batíu, fóise-y llarga y tornó la defensa. La postrera clara pal conxuntu d’Anquela túvola Christian Fdez., nun remate de cabeza n’área, qu’atrapó’l porteru del Lorca. Alfonso intervieno nos compases postreros del partíu, col Lorca volcáu, p’atrapar en primer palu un disparu rasu del ex-uviedista Nando, depués de llegada per banda esquierda. Anquela movió bancu, y Viti volvió reapaecer en cuenta de Saúl Berjón. Cotugno y Hidi tamién salieron de refrescu p’aguantar el cero a dos que xube, de momentu, al Real Uviéu a puestos de play off d’ascensu.
L’equipu vuelve n’autobús a Uviéu, y el próximu entrenamientu va ser el martes a les 17:00 hores n’El Requexón.
