El Real Uviéu sumó trés puntos fundamentales nun partíu bramente complicáu, condicionáu pol mal estáu del terrén de xuegu, añagáu pol agua dende hores primero de qu’empezare’l partíu.
Anquela repitió l’once titular de les últimes xornaes, y l’equipu volvió responder. A pesar de que Rocha falló un penalti a los cinco minutos de partíu, cometíu sobre Folch, Johanneson anotaba cinco minutos más tarde, cabeciando un centru de Linares dende la esquierda. El Real Uviéu enseñó la so cara más trabayadora, sólida y contundente dende esi momentu, con un prau que diba empeorando de la que pasaben los minutos. Osasuna nun foi quién a inquietar la meta d’Alfonso y Johannesson volvió rematar, pero esviao, un balón sueltu n’área, entornáu a la derecha. A puntu del descansu, Christian Fernández tuvo’l dos a cero nel segundu palu, pero nun llegó al remate de cabeza, d’un centru de Yeboah dende la derecha.
Na segunda metá, Osasuna trató de buscar l’empate, pero’l Real Uviéu siguió amosándose ferrial en defensa. Los únicos averamientos del equipu de Diego Martínez llegaron a balón paráu, porque’l terrén de xuegu acabó tando impracticable. Cuando al conxuntu uviedista-y fallaron les fuercies, el Tartiere llevólu a recostines, y xuntos celebraron una victoria fundamental, cola típica "haka" islandesa, n’honor al xugador asturianu, internacional con Islandia, autor del gol de la victoria. Los xugadores dieron amás les sos camisetes a los operarios que trabayaren nel prau nes hores previes y nel mesmu alcuentru, desque acabó.
L’equipu va volver a los entrenamientos mañana, dende les 10:30 hores, n’El Requexón.
