El Real Uviéu precisaba volver ganar, y foi quién. Nun partíu complicáu, énte un rival necesitáu, que punxo a prueba a los azules hasta los minutos finales del alcuentru.
Con dos cambeos na alliniación titular y la entrada de Mossa y Mariga en cuenta de Christian Fernández y Forlín, el Real Uviéu entró adulces nel partíu, énte un Córdoba que dio’l primer avisu cuando nun trescurrieren nin diez minutos de partíu. Col pasu de los minutos el conxuntu uviedista aumentó la posesión de balón, pero costába-y crear peligru. Les ocasiones más clares de los primeros cuarenta y cinco minutos llegaron en botes de
Toché, qu’unvió fuera un remate forciáu, y depués remató de cabeza esviao un centru dende la derecha.
Na segunda metá’l Real Uviéu entró más fuerte al partíu, aumentó la presión na salida y recuperación de balón, y foi quién a crear munchu más peligru, énte un Córdoba que se defendió hasta’l gol y depués buscó l’empate. Aumentaba presencia n’área rival el conxuntu uviedista, hasta que nun córner sacáu por Aarón Ñíguez, el Córdoba defendió Mequivocadamente introduciéndose l’esféricu na meta andaluza. Llegaba l’un a cero y l’equipu de Juan Merino espurrió les llinies pa buscar l’empate. El Real Uviéu, a pesar de les llegaes de los andaluzes, caltúvose seriu en defensa, y yá nel descuentu llegó la bona recuperación de Mariga p’abrir un pase a Johannesson, qu’en xugada individual firmó’l dos a cero definitivu nel tiempu añedíu.
L’equipu suma trés puntos importantes qu’asitien al Real Uviéu un pasu más arriba na clasificación, volviendo mañana a los entrenamientos dende les 10:30 hores.
