El Real Uviéu nun pudo llevar mayor premiu de Vallecas qu’un puntu, a pesar de facer méritos pa sumar un trunfu nuevu lloñe del Carlos Tartiere.
El conxuntu uviedista, que repitió once y esquema de les últimes xornaes, foi mui superior a lo llargo de la primer metá, y encaxó nuna xugada qu’empezó con una mano clara n’ataque del Rayo, pero qu’acabó en gol de Domínguez que ponía l’un a cero en marcador. El Real Uviéu reaccionó, y anotó l’empate nel minutu cuarenta, depués d’una gran primer metá ensin averamientos de los locales y col alcuentru controláu polos uviedistes. Christian Fernández acabó emburriando’l balón a la rede depués d’un centru de Mossa al área y dellos remates que refugó’l Rayo de primeres, pero qu’acabaron en gol del Real Uviéu primero del descansu.
Al empezar la segunda metá, Carlos Hernández ponía en remate a llanzamientu de córner el segundu del equipu d’Anquela, y el Real Uviéu empobinaba l’alcuentru. El Rayo aumentó la posesión nos siguientes minutos, pero una agresión a Linares acabó con tarxeta colorada a Velázquez. Poco depués, un penalti inexistente, qu’acabó con Christian Fdez. valtáu n’área pol balonazu na cara que’l colexáu decretó como pena máxima, tresformólu Trejo nel gol del empate del Rayo. El Real Uviéu tuvo’l terceru pa llevar la victoria, y Rocha tuvo la postrera, bien clara, yá nos minutos d’añedíu, pero nun balón sueltu na frontal afrelló’l remate en poste.
A la final, un puntu nuevu pal conxuntu uviedista que vuelve pa Uviéu n’autobús, primero d’empezar el llunes que vien, dende les 17:00 hores, otra selmana nueva de trabayu n’El Requexón.
