El Real Uviéu volvía a casa depués de dos xornaes lloñe del Carlos Tartiere, y fíxolo pa brinda-y a la so afición una victoria seria de la que la grada del municipal uviedín disfrutó.
Con dos cambeos na alliniación, y la entrada d’Alfonso Herrero por Juan Carlos na portería, el Real Uviéu adelantóse en marcador gracies a un gol de Carlos Hernández, a la salida d’un córner, faciendo bonos los méritos amosaos hasta’l momentu, con posesión y dominiu dafechu del alcuentru. Pocos minutos depués llegaba’l primer contratiempu, cola lesión d’Aarón Ñíguez, que sutituyíen por Yeboah a la media hora d’alcuentru. Empataba’l CD Numancia, a balón paráu, y llegaba’l descansu.
Na segunda volvió’l Real Uviéu a empezar fuerte, con munches llegaes al área, como na primer metá, y Yeboah anotaba, pero’l gol anulábase por fuera de xuegu. L’emburrie n’ataque traducióse nun remate de Johannesson al llargueru, que’l CD Numancia anotó en propia puerta, poniendo’l dos a un en marcador. El Real Uviéu quería más, atopábase cómodu y caltenía la posesión de balón, y Mossa tuvo’l terceru nuna internada n’área tres d’una bona paré con Saúl que-y arrebañó la defensa cuando diba rematar. Poco depués llegaba’l terceru, obra de Linares, que remataba una falta llanzada por Saúl Berjón. El conxuntu uviedista siguió col bon xuegu y les llegaes n’ataque, y el Numancia tuvo la postrera nun remate que s’afrelló na escuadra yá nel tiempu añedíu.
A la fin, otru trunfu nuevu nel Carlos Tartiere, que pudo disfrutar d’una victoria, primero de volver mañana al trabayu dende les 10:30 hores n’El Requexón.
