El Real Uviéu nun llevó'l premiu que, por fútbol y ocasiones, diba merecer del Tornéu Integra xugáu esta tarde n'El Berrón énte Deportivo Alavés y Real Valladolid, pero sí marchó cola satisfacción de que dio un pasu alantre nel equipu que Juan Antonio Anquela quier ver dientro de dos selmanes nel arrinque de LaLiga. Una derrota pola mínima énte'l Deportivo Alavés nuna contra aislada, depués de munches ocasiones uviedistes y un gol llegal anuláu por fuera de xuegu; y un empate a cero énte'l Real Valladolid foron los resultaos d'una tarde acorrompinada d'azul Real Uviéu n'El Berrón.
PRIMER PARTÍU
Goles Burgui (1-0), min 30.
Deportivo Alavés: Sivera, Vigaray, Duarte, Montoro, Diéguez, Ibai, Dani, Manu, Wakaso, Jony y Sobrino. Tamién xugaron: Lupu, Paulino, Burgui, Javi López y Antonio.
Real Uviéu: Champagne; Carlos Mtnez., Carlos Hdez., Christian Fdez., Mossa; Folch, Boateng, Tejera,Viti, Aarón (Saúl, min 15),Toché.
El Real Uviéu salió con más gana, intensidá, fútbol y ocasiones qu'un Deportivo Alavés qu'acababa d'imponese pola mínima al Real Valladolid nel primer partíu del triangular. Los primeros compases del alcuentru dexaron averamientos uviedistes, pero ensin remates claros. Cola entrada de Saúl por Aarón llegó un centru col esterior dende la esquierda que se pasió pela meta del conxuntu vascu ensin alcontrar rematador. Hasta trés disparos siguíos espeyó l'Alavés poco depués, y Toché protagonizaba la más clara: sacó Sivera'l so disparu n'área pequeña. A continuación respondió l'Alavés con una contra guiada por Burgui, qu'acabó solu delantre de Champagne, poniendo l'un a cero que convertía al Alavés en campión. Toché empataba'l partíu nun gol llegal, anuláu por fuera de xuegu. Asina acababen los primeros cuarenta y cinco minutos.
SEGUNDU PARTÍU (0-0)
Real Uviéu: Alfonso; Johannesson, Carlos Hdez., Christian Fdez., Mossa; Folch, Boateng, Tejera, Yoel, Saúl Berjón y Steven. Tamién xugaron: Javi Muñoz, Javi Hdez., Sandoval y Borja Sánchez.
Real Valladolid: Samu Pérez, Antoñito, Carrascal, Salisu, Raúl Navarro, Waldo, Javi Pérez, El Hacen, Antonio Domínguez, Alcaraz y Miguel.
Con trés cambeos en comparanza col primer once alliniáu, cambéu de porteru y de referencia en punta, el Real Uviéu salió con un poco menos de pegada n'ataque, pero más orde y colocación, énte un Real Valladolid que cuasimente nun inquietó la portería d'Alfonso. Tejera remató un pase de Saúl dende la esquierda, con un llanzamientu potente que Samu Pérez tornó con una gran intervención a córner. Introdució más cambeos Anquela, y el peligru uviedista volvía llegar a balón paráu, tanto en faltes como en córners, dominando dafechu'l xuegu y triando de contino área rival, pero ensin alcontrar premiu.
Col ciñu de l'afición uviedista marchó'l Real Uviéu a descansar, pa encarar dende'l martes otra selmana de pretemporada; la última primero d'arrincar la competición regular.
AST
