El Real Uviéu marchó de vacío del Reino de León, depués d’un partíu onde s’impunxo la necesidá de salvar la categoría de la Cultural Leonesa, nuna tarde na que dos mil uviedistes animaron al so equipu hasta’l final.
Empezó’l partíu con un gran ambiente azul nes grades llioneses, y con un solu cambéu nel once d’Anquela obligáu pola sanción de Christian Fernández, que-y dio entrada a Verdés.
El conxuntu local salió meyor al partíu, y dominó’l xuegu y les ocasiones na primer metá. Alfonso intervieno cuando nun s’alagamare’l primer minutu pa tornar un bon remate de Rodri que diba cruciáu derecho al segundu palu. La más clara foi de Johanneson, a la media hora de partíu, rematando nel segundu palu un bon centru de Saúl Berjón dende la esquierda. Aarón probó suerte con un disparu de lloñe, dende fuera del área, que marchó esviáu. Y xusto al borde del descansu’l llinia decretaba penalti nuna xugada d’ataque de la Cultural, que Señé tresformaba nel un a cero. Na segunda Anquela sacó tolo que tenía nel bancu hasta acabar cuasimente ensin defenses.
Llegó más el Real Uviéu nos primeros compases, con un remate de Rocha o un centru de Mossa dende la esquierda que buscaba l’área pequeña, pero tornó la defensa. Yá nel setenta, Saúl Berjón ponía a prueba al meta local nel llanzamientu de falta directa que’l porteru unvió a córner. Col Real Uviéu volcáu n’ataque y nos siete minutos de tiempu añedíu llegó’l segundu de la Cultural, p’acabar de sentenciar una nueche triste pal uviedismu, que se zarró con aplausos mutuos ente xugadores dende el prau y afición na grada, con opciones matemátiques, pero mui males de llograr la clasificación na última xornada.
