Nel fútbol, anque se compita y se xuegue perbién, dacuando nun algama pa ganar. Y la meyor prueba diose nel Ramón de Carranza, nun partíu onde’l conxuntu uviedista tuvo que tirar de castra pa competir cincuenta minutos con un home menos, y entá asina adelantase en marcador, pero marchando a la fin de vacío.
Apostó Anquela pol mesmu once que na xornada pasada, y el Cádiz salió fuerte los primeros minutos, poniendo a prueba a Alfonso, que con una gran espurrida unvió a córner el primer remate del conxuntu gaditanu. Costó-y al Real Uviéu, pero empezó a averase a la meta local, cada vuelta con más peligru. La primer llegada, en xugada de Saúl, Mossa y Aarón, acabó en córner. Col conxuntu uviedista mandando n’alcuentru, aumentando la posesión y el control del partíu, llegó la xugada na que’l colexáu Pulido Santana espulsó, con colorada directa, a Rocha por una acción en campu propiu del Cádiz, que recibió un castigu más qu’escesivu. A partir d’entós, y condicionaos con un home menos, el Real Uviéu esforcióse’l doble hasta’l descansu.
Yá na segunda metá, y nuna falta llateral colgada por Saúl Berjón, llegaba’l gol de Linares, de cabeza, poniendo’l cero a un en marcador. Anquela introdució cambeos pa refrescar al equipu del esfuerciu, pero’l Cádiz empezó a aumentar la llegada col pasu de los minutos y de la que la entrega pasaba factura a los uviedistes. Depués d’una acción na que’l Real Uviéu tuvo’l cero a dos, con un remate de Christian Fernández, solu n’área, que de cabeza unvió fuera, llegó l’empate del Cádiz. Y poco
depués el segundu y definitivu gol de los locales. El conxuntu uviedista nun pudo defender la ventaya y marchó de vacío de Carranza, nun partíu condicionáu pola decisión arbitral tan inxusta de la espulsión de David Rocha.
