El Real Uviéu volvió ganar, y fíxolo otra vez en casa, nun Tartiere que volvió ser inquebrantable. Más de quince mil uviedistes arroparon al so equipu nuna nueche metida n’agua, na qu’Anquela repitió once y sistema al respective del equipu que llogró’l trunfu la fin de selmana pasada en Lugo.
El conxuntu uviedista fíxose col control del balón de magar empezó’l partíu, siendo protagonistes de les ocasiones nos primeros cuarenta y cinco minutos. Toché tocó d’espuela, demasiao forciáu, un centru de Saúl na primer ocasión del alcuentru. Yera Berjón quien llanzaba una falta directa qu’atrapó Dimitrievsky y Cotugno remataba de cabeza, esviao, otru centru del estremu uviedín dende la esquierda. Too ello nos primeros venti minutos de partíu, pero diba ser pasada la media hora d’alcuentru cuando Saúl Berjón diba anotar, rematando dende la esquierda, l’únicu gol del partíu.
Tres del descansu, el guión siguió siendo’l mesmu, anque’l Nástic echóse más al ataque buscando l’empate. Fabbrini tuvo una ocasión clara pa sentenciar, con un disparu rasu entornáu a la derecha na frontal del área, qu’atrapó’l meta del conxuntu catalán. Respondía’l Nàstic con un bon remate n’área que tornó Alfonso, en llanzamientu a balón paráu, y Carlos Hernández volvía tener una ocasión p’anotar el dos a cero, rematando de cabeza un llanzamientu de falta que buscaba la escuadra, pero que volvió atayar Dimitrievsky. Anquela dio-yos entrada a Johannesson y Mossa, y el Real Uviéu defendióse atacando. Fabbrini volvió poner a prueba al meta del conxuntu catalán, rematando a pase de Saúl, a placer, n’área. Volvió atopase con Dimitrievsky. Mossa tuvo la postrera, con otru disparu qu’aparó’l meta visitante.
Asina se llegó a la fin, con trés puntos d’oru que vuelven al Real Uviéu a los puestos de play off d’ascensu.
