Tres una victoria nel Carlos Belmonte, l'equipu de Javi Rozada quería un trunfu nel Carlos Tartiere. El primeru de la temporada. Unu que fixera volver esfrutar a la desilusionada afición oviedista nel entamu de campaña, y diéra-y entá más aire al equipu para siguir remontando'l vueltu y triando fuerte nel camín marcáu poles xornaes anteriores. Y consiguióse.
Alfredo Ortuño, de regresu, adelantró a los oviedistas a los siete minutos de partíu. L'asistencia foi d'un Marco Sangalli en gran estáu de forma, qu'alvirtiera yá con anterioridá nel primer acercamientu carbayón a la meta catalana. Precisamente de les botes del estremu vascu, acomuñáu nesta ocasión con Saúl Berjón, llegó un bon remate del capitán na área qu'estenó la defensa a córner. Col partíu controláu y el marcador a favor, llegó la espulsión de Granell cuando trescurriera pocu más d'un cuartu d'hora de partíu. Con unu menos el Girona reaxustóse, pero'l dominiu y el peligru siguió siendo oviedista. Precisamente de les botes del pichichi oviedista, tres un gran robu de Saúl, salió'l segundu gol. De nuevu asistencia de Sangalli. Dos a cero nel marcador, pero antes de llegar al descansu, gol de Stuani que-y daba aire al Girona de cara a la segunda metá.
Y con el marcador más afechu, tres la continuación, el Real Oviedo siguió buscando ampliar la ventaya nel marcador. Una bona xugada ente Mossa y Saúl, terminó nel centru del capitán a la área, por que Borja Sánchez tresformara con gran calidá'l trés a unu. Entraron Joselu y Bárcenas dende'l banquín, y aún-y quedaba tela que cortar al partíu. Retayó de nuevu distancies el Girona, obra de Marc Gual, poniendo'l 3-2. Y el equipu de Javi Rozada, de nuevu, nun se resintió. El cuatro a dos definitivu llegó de botes del estremu panameño, que punxo'l broche d'oru al marcador y a la victoria oviedista. La primera de la temporada nel Carlos Tartiere.
AST
