El Real Uviéu nun foi quién a romper la mala racha de resultaos nel Helidoro Rodríguez López, nuna nueche onde l’ausencia de Folch fixo qu’Anquela retocare’l so once cola entrada de Verdés en defensa, adelantando a Forlín al mediu del prau.
Nos primeros compases del partíu, el conxuntu uviedista tuvo los primeros averamientos, con un llanzamientu directu de falta de Berjón qu’atrapó’l meta local, y un remate de Carlos Hernández en balón paráu que marchó cerca de la escuadra. Llegó la respuesta del Tenerife nel primer contactu col área, nuna gran xugada y execución de Longo, qu’anotó’l primeru pal conxuntu local. El Real Uviéu nun foi quién a facese col control del balón y llegó’l segundu de los locales cuando faltaben seis minutos pal descansu.
Empezó la segunda parte cola entrada de Fabbrini, en sustitución de Mossa, y cambéu nel esquema. La primera foi del italianu, y un defensa local tornó na raya de gol. El Tenerife tuvo opciones d’ampliar el marcador, pero a la final Forlín llograba poner el dos a un y volver meter al Real Uviéu nel partíu. Tuvo opciones el conxuntu uviedista d’empatar, con un centru de Fabbrini qu’esperaba Toché, pero atrapó’l meta local, y un remate de cabeza de nuevo de Carlos Hernández en balón paráu que marchó alto. Foi entós, a la contra, cuando sentenció’l conxuntu canariu poniendo’l trés a un definitivu y ensin marxe pa la reacción del equipu d’Anquela.
Una derrota qu’allarga la mala dinámica del conxuntu uviedista nes últimes xornaes, primero de volver a Uviéu mañana y empezar el llunes a preparar el partíu énte’l Granada.
