Yá lo avisare l’entrenador del Real Uviéu a lo llargo la selmana, y l’Albacete llegó al Carlos Tartiere a facer el so partíu, como un rival más d’una categoría desaxeradamente igualada y competida. El conxuntu uviedista nun tuvo la so tarde y nun foi quién a acertar nes ocasiones de gol pa llevar un premiu mayor, pero caltién la racha d’imbatibilidá nel municipal uviedín.
Cola ausencia del sancionáu Rocha y la única entrada obligada nel once titular de Hidi nel so sitiu, el Real Uviéu salió cola mesma imaxe de siempre énte un Albacete dispuestu a facer el so partíu nel Carlos Tartiere. L’equipu nun s’atopó cómodu na primer metá, y Alfonso atayaba’l primer averamientu del equipu d’Enrique Martín. Los averamientos uviedistes llegaron en botes de Saúl, con un disparu qu’unvió a córner la zaga visitante, y dos remates de Linares, el segundu buscando la escuadra, que tornó’l meta local. A balón paráu un remate de Christian tuvo a puntu d’atopase col gol.
Tres del descansu, el Real Uviéu camudó la cara y metió una marcha más al partíu en busca de la victoria. Dende’l bancu entraron Toché y Fabbrini de refrescu cuando meyor taba l’equipu d’Anquela, y la más clara llegó en botes del ariete murcianu, con un pase de Mossa que-y arrampuñó de les botes el meta visitante. Apertó’l Real Uviéu hasta los compases finales, a balón paráu y con centros sobre manera dende la esquierda, ensin aciertu de cara a portería.
Finalmente un puntu que recuerda la dificultá de la categoría, y que va llevar al equipu d’Anquela a La Romareda la selmana que vien. El próximu entrenamientu va ser el martes, a les 17:00 hores n’El Requexón.
