El Municipal de Butarque acoyó la xornada 8 de LaLiga Smartbank, qu'enfrentó al CD Leganés y al Real Oviedo, con victoria madrilana por 2-1.
Énte selmanes con dos partíos, Ziganda tiró de rotaciones nel once, cola entrada d'hasta diez xugadores pa midise al CD Leganés, respectu al equipu que saltó'l pasáu domingu al verde del NMR Carlos Tartiere. Brazão, Johannesson, Arribas, Bolaño, Lucas, Aburjania, Jimmy, Viti, Cedric y Obeng entraron en tema, nun partíu que se decidió pola pegada del conxuntu
madrilanu. El Real Oviedo siguió fiel a la identidá que-y imprime Ziganda, con un orde defensivu que-y caracteriza dende l'empiezu de la competición, que na primer metá nun concedió ocasiones clares al Leganés, sacantes una bona intervención de Brazão, que detuvo'l disparu de los atacantes pepineros. El Real Oviedo, con Jimmy y Aburjania na medular, trataba de
xenerar xuegu y Obeng tuvo nes sos botes, con un tiru cruzáu, la ocasión más clara pa los azules nel primer actu.
Tres el pasu por vestuarios, Ziganda fixo un cuadriple cambéu, col enfotu de imprimi-y al equipu enrite frescu, cola entrada de Tejera, Nahuel, Sangalli y Juanjo Nieto. El Leganés, al que-y sonrió la fortuna, aprovechó un rebote na área p'abrir el marcador. Énte'l tantu local los de Ziganda buscaron igualar la guerra, buscando l'arcu defendíu por Cuéllar. Un despiste defensivu llevó al Leganés a poner el segundu tantu nel marcador, y a la fin Samuel Obeng cabeció un balón botáu dende la esquina pa maquillar la resultancia.
Derrota en Butarque del Real Oviedo, que dende mañana va trabayar cola mente puesta nel partíu del miércoles énte'l Logroñés. L'alcuentru va disputase nel NMR Carlos Tartiere dende les 21:30 hores.
