Trés victories siguíes, pero la cuarta nun pudo ser. El Real Uviéu frenó en seco en La Romareda nun partíu seriu en defensa pal conxuntu uviedista, qu’aguantó bien los primeros compases del partíu, con dominiu del Real Zaragoza y tratando d’aprovechar les opciones a la contra. Asina llegaron les más clares, con un xu de Bárcenas que recatió y buscó’l disparu apegáu al poste. Sacó Cristian Álvarez. Mossa tamién la tuvo clara remantando de cabeza nel segundu palu, axustao al poste. La mano del meta local evitó’l gol. La postrera foi de Johannesson, nun pase al espaciu de Folch. Robó-yla la defensa. A puntu del descansu tapó perfecto Champagne un remate na ocasión más clara del conxuntu mañu.
Na segunda siguió’l guión del partíu y nel 60 un penalti claru sobre Yoel Bárcenas podía poner per delantre a los azules. Alanís llanzó y Cristian Álvarez paró. Apertó’l Zaragoza y Champagne respondía. Joselu punxo un centru al que nun llegaron a rematar nin Mossa nin Bárcenas. Marcaba’l Zaragoza nuna contra con mala suerte pa los uviedistes, con fuera de xuegu y falta sobre Johannesson que nun se decretó. Álvaro Vázquez ponía l’un a cero, pero’l Real Uviéu nun s’engurriaba. Entró Toché, y con diez minutos el conxuntu uviedista buscaba l’empate. Volcaos, llegó la sentencia de nuevo con un golazu d’Álvaro Vázquez, qu’anotaba’l dos a cero definitivu.
