El Real Uviéu coló de vacío de La Romareda nun partíu que’l Real Zaragoza decidió na segunda metá, depués d’un alcuentru controláu hasta esi momentu, anque ensin demasiáu peligru n’ataque pol conxuntu uviedista.
Anquela volvió apostar pol so once titular avezáu, cola vuelta de David Rocha desque cumplió sanción. Los primeros averamientos uviedistes llegaron dende la esquierda, a centru de Mossa con un remate de Folch que tapó la defensa. Depués foi Rocha quien remató con un disparu esviáu un pase d’Aarón tamién dende la banda esquierda. Alfonso intervenía na contra del Zaragoza, sacando una mano que tornaba’l peligru, y Aarón tuvo la más clara nun disparu cruciáu, que’l meta del conxuntu mañu unvió a córner. El Real Uviéu apertó nos últimos compases de la primer parte, con una xugada onde los uviedistes remataron hasta trés veces, tornando la zaga, nuna xugada qu’acabó invalidada por fuera de xuegu.
Na segunda metá Christian Fernández tuvo la más clara nuna xugada a balón paráu que remató nel segundu palu, pero volvió aparar Cristian Álvarez. Llegó la vez de nueves pa qu’Alfonso Herrero primero, y Mossa depués, espeyaren dos remates del Zaragoza. Pocos minutos más tarde llegaba’l primer gol del conxuntu local, nun pase ente llinies que Borja Iglesias enchufó a la escuadra. Pocos minutos depués, y nuna xugada de mala fortuna, llegaba’l dos a cero en propia puerta. Anquela dio-y entrada primero a Toché y depués a Fabbrini y Yeboah, y el Real Uviéu emburrió buscando recortar distancies hasta’l final. A puntu del noventa llegaba’l dos a un pal conxuntu uviedista, que s’atopó ensin tiempu pa llograr l’empate. A Saúl Berjón espulsábenlu por doble mariella cerca del pitíu final.
Una derrota que dexa al Real Uviéu ensin sumar, pero caltiénlu en puestos de play off d’ascensu. L’equipu vuelve mañana a los entrenamientos.
