El Real Uviéu coló de vacío d’El Sadar nun partíu qu’abultaba fundamental pa les aspiraciones de play off de dambos conxuntos.
Con dos cambeos nel once, la entrada de Varela y de Hidi pol sancionáu Mossa y por Fabbrini, el conxuntu uviedista camudó tamién el sistema, y aguantó nos primeros cuarenta y cinco minutos a los locales. Foi Linares quien aprovechó’l primer averamientu claru uviedista, pa, nun error de la defensa local, adelantar al conxuntu azul en marcador. Trescurría’l minutu dieciséis de partíu, y el Real Uviéu siguió siendo intensu y solidariu. Defendíase con criteriu, y averóse con peligru nun bon centru de Varela qu’atrapó Herrera depués de cayer valtáu Linares n’área. Llegóse al descansu ensin mayores complicaciones pa caltener la ventaya en marcador.
Na segunda Osasuna salió a pol partíu, y nos primeros compases llegaba con peligru a la meta defendida por Alfonso. El conxuntu azul caltuvo la seriedá en defensa, hasta que nel 56 un valtamientu d’Alfonso sobre Ibañez n’área acabó en penalti a favor de los coloraos. Fran Mérida anotó dende los once metros, y col empate en marcador, el Real Uviéu volvió espurrir les llinies buscando mayor presencia n’ataque. Anquela dio-y entrada a Aarón en sustitución de Hidi, y poco depués Osasuna anotaba’l segundu, obra de David Rodríguez. El Real Uviéu tuvo la postrera, nun llanzamientu de córner qu’acabó con dellos rebotes n’área, yá en tiempu añedíu, pero a la fin coló de vacío d’El Sadar.
El próximu entrenamientu del equipu va ser el llunes, a les 18:00 hores n’El Requexón.
