El Real Uviéu rompió la racha tan positiva de resultaos encaxando una derrota bien dura (1-2) énte’l Real Valladolid, nun vienres nel que l’afición del Tartiere volvió responder.
Anquela repitió once, pero d’esta vuelta’l Real Uviéu nun foi quién a atopase cómodu en nengún tramu del partíu. Na primer metá la ocasión más clara pal conxuntu uviedista foi nel llanzamientu d’un córner, nel que Carlos Hernández remató de cabeza marchando’l balón por poco. El conxuntu pucelanu nun esmoleció demasiao la meta uviedista, pero sí lluchó pola posesión del balón, incomodando al equipu d’Anquela.
Na segunda metá’l partíu siguió pel mesmu guión. Mata anotaba nel 59 el cero a un, y poco depués, nuna xugada a balón paráu, Ramón Folch tocaba un balón que se metió pa la rede, col cero a dos que dexó’l conxuntu uviedista tocáu. Anquela introdució de siguío dos cambeos, con Johannesson y Yeboah, y poco depués dio-y entrada a Linares, y a partir d’entós empezó’l mayor emburrie uviedista, anque ensin demasiada claridá n’ataque. Masip atayó los remates primero de Yeboah y depués de Toché, y a cinco del noventa Linares recortaba distancies col un a dos. El Real Uviéu volcóse n’ataque, pero nun llogró l’empate, quedando ensin puntuar nun partíu ensin aciertu pal conxuntu uviedista.
La vuelta al trabayu va ser mañana, sábadu, dende les 10:30 hores n’El Requexón.
