La sala de prensa del Carlos Tartiere acoyó esti meudía la presentación del equipu Real Uviéu de LaLiga Genuine, qu'esta temporada va empezar l'andadura nesta competición.
Trátase d'un proyectu integrador y socialmente responsable que busca normalizar la práctica del fútbol, faciendo partícipe a la sociedá nel compromisu del fútbol profesional cola diversidá y la inclusión.
D'esta manera, el Real Uviéu súmase a los más de 300 futbolistes, 72 técnicos y 18 clubes que la temporada pasada participaron d'esta iniciativa que promueve LaLiga.
L'equipu del Real Uviéu en LaLiga Genuine va exercitase selmanalmente nel Fundoma, onde va preparar la competición, que se va desenvolver en 6 xornaes.
El Real Uviéu agradez al Colexu Latores, Asociación de Síndrome Down Asturies y ADANSI la collaboración nesti proyectu.
Nel actu de presentación, que tuvo presidíu pol Conseyu d'Alministración del club, amás de polos xugadores del primer equipu Saúl Berjón, Christian Fernández y Toché, Jorge Menéndez Vallina dio-yos la bienvenida, asegurando que “sois un equipu del nuestru club, así que tenéis qu'entrenar duro. Ye un motivu de gran allegría, y de xuru que vais llevar esti escudu con gran arguyu”.
L'equipu del Real Uviéu pa LaLiga Genuine va empezar los entrenamientos nos díes vinientes y vas poder siguir el so día a día nes nuestres canales de comunicación oficiales.
AST
