Foi una nueche lloca y estraña, con un partíu en martes. Lluviosu, en xunu yá, y con muncho en xuegu pa dambos conxuntos nel Carlos Tartiere. Y con final feliz pal Real Oviedo.
Sergio Egea tornó al 4-4-2, dando entrada a Omar Ramos en banda derecha y a Steven en punta xunto a Joselu. Volvía tamién Saúl Berjón, Javi Hernández y Christian Fernández. La primer metá demostró lo que se xugaba'l Rayo Majadahonda. Namás -y valía ganar pa evitar el descensu. Adelantóse nel marcador con un gol del ex oviedista Varela en llanzamientu directu de falta. Y empataba Johannesson antes del descansu, a pase de Steven nel área.
Na segunda metá'l guión paecía sentenciáu dempués de que'l Real Oviedo nun atinara nun par d'acercamientos y el Rayo Majadahonda raspiara la salvación con un 1-3 a favor. Pero non. Salieron Ibra, Viti y Tejera dende'l banquín nós segundos 45 minutos, y los 10 minutos bastáron-y al conxuntu de Sergio Egea pa rematar una remontada épica. Carlos Hernández retayó distancies nel 80. Joselu anotaría l'empate nel 84, y tres delles ocasiones clares que nun terminaben d'atopar portería, col Tartiere puestu de pies, llegó la traca final en forma de gol, con autopase incluyíu, d'un Joselu que marcaría'l 4-3 nel últimu sollutu del tiempu añedíu.
El Real Oviedo va volver mañana a los entrenamientos principiando a preparar el partíu caberu de la temporada, el sábadu en Pamplona, con opciones matemátiques d'algamar una plaza de play off d'ascensu
AST
