Yera'l tercer partíu nuna selmana para'l Real Oviedo, y tres la victoria sumada en Tenerife, l'equipu de Javi Rozada quería ganar per primer vegada nel Tartiere. Cambeos nel once, hasta trés con al respective de l'alliniación nel Heliodoro Rodríguez López, para enfrescar a los sos xugadores y en base al plan de partíu frente a un rival que llegaba al estadiu uvieín con siete xornaes ensin conocer la derrota.
Los primeros minutos fueron estraños, por un llargu parón nel xuegu por causa de la grave mancadura d'Héctor Hdez, que foi treslladáu n'ambulancia al HUCA. El Tartiere despidió al xugador del Numancia ente aplausos, y cuando el Real Oviedo diba metiéndose nel partíu, tres dos disparos que s'estrellaron nel poste, llegó'l gol de Yoel Bárcenas, a pase de Saúl Berjón dende la esquierda. Yera'l minutu 17 de partíu, y Alfredo Ortuño tendría una clara p'ampliar ventaya antes del descansu. De nuevu un centru de Saúl dende la esquierda, que tocó lo xustu el delanteru oviedista pero un defensa estenó a córner. El guión na primer metá nun pudo ser meyor pa un conxuntu oviedista que nun pasó nengún apuru y amosó la so meyor versión.
Na segunda metá, y tres unos minutos nos qu'el Numancia goció d'un acercamientu nel qu'estenó Nereo Champagne, Rozada fixo doble cambéu retirando a Joselu y Lolo, dando entrada a Jimmy y Borja. Dos remates, de nuevu, del Real Oviedo fueron atayaos con dos bones intervenciones de la meta visitante, Dani Barrio. Tamién un disparu de Tejera dende la frontera, que diba afechu al palu, y atayóse con un estene a córner del porteru. Tamién Champagne intervieno, hasta'l trés disparos consecutivos, p'alloñar el peligru de la meta oviedista. Sufría'l Real Oviedo nos compases finales, y sobro el noventa, un disparu dende la frontera terminó raspiando nun de los defenses azules, llegando al segundu palu y siendo emburriáu por Carlos Gutiérrez, anotando l'empate definitivu.
Nun hubo tiempu a más, y el Tartiere, el so equipu y la so afición, volvió dise a casa cargáu de decepción.
AST
