Dacuando, el fútbol, como la vida, pue resultar inxustu, y la de güei foi una d’eses nueches nes que’l Real Uviéu nun llevó’l premiu que merecía.
Un empate delantre’l Real Zaragoza, qu’acabó ensin el porteru, espulsáu por perda de tiempu, nel que’l conxuntu uviedista vacióse ensin llograr un gol que diba suponer una victoria fundamental pa reenganchase a los puestos de play off d’ascensu.
Col mesmu once que la fin de selmana pasada en Tarragona, el Real Uviéu foi ameyorando nel partíu de la que pasaben los minutos. Ratón alzóse como héroe del conxuntu mañu, espeyando a córner un primer averamientu de Carlitos con pase al corazón del área, y depués con dos paraes a remates de Nando y Costas, nos que’l porteru del Real Zaragoza salvó los muebles del so equipu. Christian Fernández remataba nel segundu palu un balón que cruciaba per delantre de la portería maña, mentes que Carlitos tiraba directu a puerta un llanzamientu de falta qu’otra vez Ratón unviaba a córner. Juan Carlos intervieno p’arrebater l’únicu remate a puerta del Real Zaragoza en tol partíu, y llegábase al descansu col Real Uviéu más qu’enchufáu.
Na segunda metá Ratón volvió ser el protagonista máximu del equipu de Láinez, y Fernando Hierro dio-yos entrada a Saúl Berjón y Michu, por Carlitos y Nando. El Real Uviéu dedicóse dafechu al ataque, y Toché nun algamó un balón que Christian Fernández ponía dende la esquierda al área pequeña, y Michu unvió raspiando’l poste otru centru que cabeció fuera. Llinares tuvo la postrera, nun balón cruciáu qu’otra vez atayó Ratón, espulsáu a la fin por perda de tiempu.
Asina acabó un partíu onde’l Real Uviéu sumó un puntu más, primero de volver mañana a los entrenamientos preparando’l partíu que vien énte’l Córdoba.
