El Tartiere nun foi abondo y el Real Uviéu encaxó esta tarde una de les poques derrotes de la temporada como local, énte un Alcorcón que llevó los trés puntos nel tiempu añedíu del alcuentru.
Anquela formó con un once onde l’únicu retoque foi Hidi pol sancionáu Rocha y, anque na primer metá’l conxuntu uviedista tuvo’l partíu controláu, los averamientos llegaben cuasimente en balón paráu. La primera del partíu llegaba nun balón bombiáu dende la esquierda que tornaba Casto a córner. Alfonso tamién intervenía p’atayar un llanzamientu del conxuntu alfareru, y Christian Fernández probaba suerte, nel refugue d’una xugada d’estratexa, con un disparu potente que buscaba la escuadra pero marchaba por poco. Toché tamién tuvo la so oportunidá primero del descansu, nun remate n’área tres de bona xugada de Saúl y Mossa pela esquierda, pero salió fuera.
Na segunda llegaron los meyores averamientos uviedistes, de botes de Toché, que volvía rematar n’área afrellando’l balón en llargueru, y poco depués anotaba un gol anuláu por fuera de xuegu. Anquela dio-y entrada a Aarón y poco depués a Linares, y del ilicitanu llegó otra ocasión bien clara, nel segundu palu, rematando de cabeza un balón que marchó esviáu por poco. Yá nel tiempu añedíu, una contra del Alcorcón acababa en gol del ex-uviedista Jonathan Pereira, dándo-y los trés puntos al conxuntu alfareru, nuna mala tarde nel Carlos Tartiere.
L’equipu va volver empezar los entrenamientos el martes, a les 18:00 hores, n’El Requexón.
