La vuelta de Sergio Egea al Carlos Tartiere nun foi perfecta, pero cuasi. El Real Oviedo compitió enforma y remontó una resultancia en contra, con opciones de llevase la victoria, ente un bon Granada en puestos d'ascensu directu.
Col once idénticu al de la última xornada en Almería, el Real Oviedo plantegó una primer parte bien seria, con una presión afogadiza al xuegu de la Granada, que nun fue a crear peligru nos primeros cuarenta y cinco minutos. Sí tuvo les sos ocasiones el conxuntu oviedista, con un remate al refugue de Sergio Tejera que-y pegó taragañao y coló raspiando'l poste. Remató forzáu Christian Fernández y coló por bien poco, nel segundu palu, a saque d'esquina de Saúl Berjón. Ibra tamién tuvo la de so nún remate que-y paró Rui Silva, el porteru del Granada.
Tres el descansu, l'equipu andaluz camudó'l guión del partíu. Optó polos balones en llargo, ensin sacar en curtio pa evitar la presión llocal, y nel primer acercamientu y remate a puerta llegó'l so gol. Fede Vico anotaba'l cero a unu, y al Real Oviedo costó-y unos minutos reaccionar. Ximielgó’l banquillu Sergio Egea dando entrada a Viti y Toché, y l'equipu foi creciendo progresivamente hasta'l final del alcuentru. Ibra anotaba un golazu que daba l'empate, y entá tendría dos más el conxuntu oviedista nel tiempu añadío. Una de nuevu del delanteru senegalés, que nun atinó nel remate de cabeza, y otra de Folch qu'atayó’l meta granadín.
El Tartiere afaló a los suyos hasta'l pitíu final, con un namás puntu de premiu que dexa al conxuntu oviedista a tres del play off d'ascensu. El prósimu entrenamientu va ser el miércoles a les 10:30 hores pa empezar preparar la visita al Málaga del prósimu llunes.
AST
