Yera’l campu del líder, el postrer partíu de la primer vuelta, y el Real Uviéu demostrólo dende’l primer minutu. L’equipu despachó ún de los meyores primeros cuarenta y cinco minutos de la temporada a pesar de tener la oportunidá d’adelantase nun penalty, que Remiro-y atayó a Linares, y de que’l gol del Huesca fore más frutu de la mala suerte, por un despiste d’Alfonso nun saque de puerta.
El conxuntu uviedista salió más metíu al partíu y dominó los primeros compases del alcuentru. Llegó asina un disparu de Rocha, tres de gran xugada individual de Johannesson, que marchó fuera por poco. Poco depués, un penalty sobre Aarón Ñíguez tirólu Linares pero Remiro aparaba debaxo los palos. Siguía l’empate a cero en marcador, pero entá diba venir lo peor pal Real Uviéu. Nun saque de puerta, Alfonso nun vio a Alex Gallar detrás d’él, y el delanteru foi quién a roba-y l’esféricu y anotar l’un a cero. Tamién d’esi golpe se diba reponer el conxuntu uviedista, y diba acabar controlando la primer metá, hasta’l descansu.
Na segunda metá, l’equipu caltuvo la cara al partíu, y de la que pasaben los minutos aumentó la presencia n’ataque. Depués d’un par d’averamientos y balones paraos, diba llegar la xugada del gol per banda esquierda. Empezada por Mossa, con pase a Saúl, que con dellos recaties foi quién a centrar p’Aarón, y esti acabar una xugada bien guapa col gol del empate. Y asina acabó’l partíu, col Real Uviéu trabayando hasta’l final, y faciendo méritos pa poder llevar un mayor premiu del campu del líder, d’onde salió cola primer vuelta completada y terceru na clasificación.
