El Real Uviéu coló de Córdoba con un puntu que-y supo a poco al equipu de Juan Antonio Anquela, depués de caltener la ventaya en marcador a lo llargo de bona parte del alcuentru, y a la fin encaxó l’empate a un nel minutu 87.
Empezó’l Real Uviéu con dos retoques nel once, con Fabbrini en banda derecha y Cotugno nel llateral. El conxuntu azul caltuvo’l control del partíu nos primeros minutos, anque ensin demasiaos averamientos a la meta cordobesa. Rocha probó suerte con un disparu dende la frontal que marchó alto, y cuando nun s’algamare la media hora de partíu llegaba’l gol uviedista, fabricáu na banda esquierda, con pase de Saúl a Mossa, y asistencia n’área pa que Fabbrini anotare de primeres. La respuesta del Córdoba llegó de siguío, nun llanzamientu de falta de Reyes que buscaba la escuadra y qu’Alfonso, nun paradón, unvió a córner. Fabbrini probó suerte a puntu del descansu, con un llanzamientu de lloñe, qu’atrapó Kieszek.
Na segunda’l Córdoba enfrescó llueu’l bancu en busca del empate, pero’l Real Uviéu caltenía la solidez defensiva. La más clara p’anotar el cero a dos túvola Linares, solu n’área, recibiendo un pase dende la esquierda que remató fuera. Aytami marcaba l’empate nun refugue en cantu del 90 y, entá asina, el Real Uviéu tenía la postrera, nun pase de Johannesson apegáu al palu derechu que nun s’acertó a rematar.
A la fin, un puntu que nun dexa contentu a un Real Uviéu que volvió amostrar la so meyor imaxe lloñe del Carlos Tartiere y que yá piensa nel partíu que vien énte’l Alcorcón, que va empezar a preparar dende’l llunes, a les 10:30 hores, n’El Requexón.
