La Xornada 27 en LaLiga SmartBank enfrentó nel Carlos Tartiere a Real Oviedo y SD Huesca, nun partíu nel que los oviedistas nun supieron remanar la renta de tres goles que consiguieron na primer metá, collechando un puntu a la fin de los noventa minutos.
El choque, que sirvió para homenaxar al que fuera xugador del Real Oviedo, Juan Carlos Unzué, que llevó a cabu'l saque d'honor, recibiendo una calorosa reconocencia de l'afición oviedista, púnxose-yos de cara a los azules, que saltaron al terrén de xuegu con un once formáu por Femenías; Carlos Isaac, David Costas, Dani Calvo, Pierre; Viti, Luismi, Brugman, Borja Sánchez; Obeng y Borja Bastón, con tres bonos goles a la media hora de xuegu. El primeru, tres un bon centru de Carlos Isaac, Borja Bastón aprovechó un balón refugáu, tres un primer tiru, para bater a Andrés Fernández. Amosaba'l Real Oviedo les sos ganes de dir a por más, con acercamientos y bon fútbol. Nuna d'estes acciones na área, Samu Obeng definió con una guapa chilena para poner el segundu. El terceru foi obra de Carlos Isaac, con un potente tiru dende la esquina de la área que foi directu a la escuadra. L'Huesca retayo distancies en cantu del descansu.
Tres el pasu por vestuarios, el conxuntu oscense salió más activu que los de la capital del Principáu, frutu de les urxencies nel marcador, llevando'l pesu del partíu y quitó-y la pelota a los del Cuco Ziganda. Femenías, con una bona intervención, evitó un nuevu gol de la SD Huesca. El segundu tantu de los visitantes llegó nel minutu 56. Ziganda movió'l banquín y dio entrada a Jimmy. L'empate de la SD Huesca llegó nel últimu tramu del choque, a un cuartu d'hora del pitíu final, cuando Ignasi Miquel aprovechó un refugue na área ente'l que nada pudieron facer los azules. Lucas Ahijado y Javi Mier fueron los siguientes n'entrar al campu, siendo Pombo y Sangalli les últimes incorporaciones de Ziganda, que vio la cartulina colorada al entender l'árbitru que protestaba una de les sos decisiones.
El Real Oviedo esbardia la oportunidá de sumar de tres ente unu de los a priori candidatos a engarrar pol Play Off, quedándose con mal sabor de boca trés nun saber aprovechar la renta de tres goles cola que trescurría la primer parte. El Real Oviedo va viaxar la próxima fin de selmana a tierres castellanes pa vese les cares col Burgos CF nel Plantío.
