Dende’l 2017 nun xugaba’l Real Uviéu nel Carlos Tartiere. Un mes natural qu’acaba güei con un partíu qu’empezó raru enriba’l terrén de xuegu, como si’l conxuntu uviedista estrañare xugar nel so feudu, pero qu’a la fin volvió ser una demostración de fe y d’equipu que nunca se da por vencíu.
Empezó l’alcuentru con trés cambeos obligaos nel once poles sanciones, y cola parte esquierda de la defensa reconstruyida con Verdés, Valentini y Varela. El Real Uviéu llegaba a la meta rival de ralo en ralo, y René aparaba los pocos averamientos claros pela parte uviedista. Les más clares foron de Linares, qu’a puntu tuvo d’adelantase en marcador en dos ocasiones primero del descansu. L’Almería tuvo posesión, pero nun llegó a crear peligru.
Asina s’algamó la segunda parte na que’l partíu camudó cola entrada de Toché, y el retoque nel esquema. Llegaba de les sos botes el gol del empate, tres d’una gran xugada ente Aarón, Saúl y Linares firmada pol ariete murcianu, y el Tartiere emburriaba a los sos a pola remontada. Foi precisamente Toché quien combinó con Saúl y Linares pa que Berjón punxere’l dos a un definitivu en marcador. El Real Uviéu defendióse hasta’l final, con delles contres que pudieron acabar con una ventaya mayor, y el Tartiere volvió quedar colos trés puntos. Una vez más, inquebrantable.
