Estadiu El Toralín, 2.500 espectadores. Fondos destinaos a Cruz Bermeya.
SD Ponferradina: Gianfranco; Son, Ríos Reina, Jon García, Míchel Zabaco, Óscar Sielva, Isi, Jorge García, Pablo Espina, Yuri y Matthieu. Tamién xugaron: David Gómez (ps), David Lorenzo, Trigueros, Moli, Joaquín, Saúl, Andrés, Dani Pichín, David Grande, Alejandro Lorenzo y Diego Santín.
Real Uviéu: A. Herrero; Lucas, Forlín, Javi Hernández, Mossa; Folch, Tejera, Boateng; Aarón Ñíguez, Saúl Berjón y Steven. Tamién xugaron: Champagne (ps), Johannesson, Carlos Hdez., Toché, Yoel Bárcenas, Lobato, Javi Muñoz, Prendes, Asier, Edu Cortina y Borja.
El Real Uviéu xugó’l tercer amistosu de la pretemporada nuna tarde soleyera, de muncha calor en Ponferrada, y notando la cansera acumulada de les sesiones tan intenses de pretemporada. Nun se vio un equipu frescu, qu’a pesar de too siempre buscó tener el balón y amostró, percima de too, muncha seriedá en defensa. Na primer metá, y con presencia nel once de dellos de los xugadores del filial que completen la pretemporada col primer equipu, Anquela punxo de mano la pólvora nes bandes, volviendo apostar por Steven como referencia en punta. Los primeros averamientos, ensin peligru, foron de la Ponferradina, qu’entró con más fuercia al partíu. De la que pasaben los minutos el Real Uviéu fíxose col control del balón, y una posesión que yera uviedista, anque ensin demasiada frescura n’ataque. Un balón solitariu llucháu por Aarón acababa en saque de portería, y dalguna xugada a balón paráu terminaba ensin remate. Namás una xugada de peligru fabricada entre Mossa, Saúl y Boateng acabó en remate del media punta tornáu pola defensa local. La seriedá defensiva caltúvose p’arrebater les llegaes de los locales, con dos balones ensin peligru qu’acabaron nes manes d’Alfonso Herrero. Aarón Ñíguez retiróse con molesties a puntu del descansu y cambiáronlu por Johannesson.
Na segunda metá Anquela enfrescó l’once dafechu sacante na banda derecha, calteniendo a Lucas nel llateral y a Johannesson en banda. Yoel Bárcenas debutó nel minutu 62 de partíu, retrasando Johannesson la posición al llateral, y asitiándose en banda en sustitución de Lucas. De les sos botes llegó precisamente’l remate, al refugue d’un llanzamientu de falta, que la defensa tornó a córner. Toché intentólo peñando un balón nel segundu palu, a centru de Borja Sánchez, pero’l defensa adelantólu nel saltu. Una bona internada de Johannesson en banda acabó en falta nel llateral del área, que botó Asier, con remate esviáu de cabeza de Carlos Hernández. Nos últimos minutos llegaron les ocasiones más clares pa la Ponferradina, que buscó’l gol poniendo a prueba a Champagne. El meta arxentín tornó un disparu cruciáu, yá a puntu del final, dexando’l marcador col empate a cero inicial.
L’equipu dexó Ponferrada con un empate, y atropando carga de minutos, ensin encaxar gol. L’entrenamientu viniente va ser mañana, a les 11:30 hores, n’El Requexón.
