Un añu, cinco meses y catorce díes dempués el Carlos Tartiere volvió cuntar cola presencia d'aficionaos nes graes, que vieron l'empate del conxuntu de la capital del Principáu na primer xornada de la 21/22 en LaLiga SmartBank ente'l CD Llugo. 5.769 oviedistas volvieron a rencontrase col so equipu, animando y sofitando a los de Ziganda de principiu a fin.
Con un once formáu por Femenías; Lucas, Costas, Dani Calvo, Pierre; Javi Mier, Jimmy, Mossa; Viti, Borja Sánchez y Obeng saltaron los azules al verde del Carlos Tartiere, y ficiéronse dende los primeros minutos cola clara intención d'empezar el cursu ganando, metiéndo-y ritmu ya intensidá al choque. Dende la posesión, el Real Oviedo llevó'l xuegu al campu del CD Lugo, que s'emplegaba en defensa pa frenar les acometíes carbayones. Mossa y Viti tuvieron dos causes clares que'l porteru visitante esbarataba. Sería'l de Llaviana'l qu'adelantraría a los azules, tres una bona xugada que l'estremu oviedista remataba ensin que óscar pudiera faer nada. Nun dio tregua'l Real Oviedo, con otru tantu a los pocos minutos. Samuel Obeng aprovechó un centru de Borja pa rematar a prestar y poner el segundu nel lluminosu pa los de la capital del Principáu. Ensin apenes pasar apuros en defensa, la primer parte concluyó con una nueva ocasión pa los azules. Borja Sánchez, a saque de falta de Pierre, cabeció un balón dientro de la área que'l porteru gallegu detuvo.
Na segunda metá, el Real Oviedo volvió salir más enchufado qu'el so rival, buscando la meta lucense dende'l minutu unu del segundu actu. Los azules quitáron-y el balón al Lugo y empezaron a crear peligru, con Viti, Obeng y Borja Sánchez bien activos n'ataque. La solidez defensiva volvió faese patente, col equipu bien aplicáu nes poques ocasiones xeneraes polos gallegos. Viti tuvo la más clara de la segunda metá, pero foi baltáu na área y nun llogró rematar l'acción. El Lugo retayó distancies nel marcador. Ziganda movió'l banquín y dio entrada a Jirka y Bolaño. Los visitantes empataron la guerra a tres minutos pal final, cuando l'árbitru señaló, con ayuda del VAR, una mano na área de Pierre. Intentáronlo los azules hasta'l final, pero la fortuna nun cayó del llau oviedista.
Primer puntu de la temporada pal Real Oviedo, que la próxima xornada va viaxar hasta tierres andaluces pa vese les cares col Almería. El choque va disputase en Los Juegos del Mediterráneu'l vienres, dende les 22:00 hores.
