Lugo yá yera azul, porque más de mil uviedistes encargárense de tiñir les sos cais d’arguyu carbayón. Y los once homes enriba del terrén de xuegu tuvieron al altor firmando una victoria seria, y sumando trés puntos necesarios pa recuperar la calma que dexare tocada la derrota énte’l Real Zaragoza.
Con dos retoques n’once, cola entrada de Forlín y Ramón Folch en cuenta de los lesionaos Carlos Hernández y Tejera, el conxuntu uviedista salió bien fuerte al partíu. Christian Fdez. avisaba cabeciando un saque de córner qu’atrapaba’l meta local y, al minutu, diba llegar el primer gol, obra de Joselu, definiendo perfecto un gran pase de Ramón Folch. El Lugo respondía metiendo una marcha más n’ataque, y un gol anuláu en fuera de xuegu foi la so ocasión más clara de la primer metá. Bárcenas intentólo dende la esquierda, nun remate qu’acababa en manes de Juan Carlos, y Alfonso Herrero tamién s’espurría pa unviar a córner un disparu que buscaba’l llargueru. Llegóse al descansu con ventaya mínima pa los azules en marcador.
Yá na segunda, de nuevo Bárcenas y Joselu protagonizaben una ocasión clara, na que’l panameñu decidía xutar, mentes Joselu esperaba’l pase. Atrapó’l meta local. Y poco depués, una contra de manual onde participaron dellos xugadores uviedistes cayó nos pies de Javi Muñoz y empaló’l mediocampista cola derecha anotando’l cero a dos dende la frontal del área. A partir d’esi momentu, y a pesar de los cambeos, llegaron los peores minutos pal Real Uviéu. El Lugo echóse al ataque y los d’Anquela bregaron a fondo en defensa, tratando d’aprovechar les contres colos gallegos buscando’l gol. Toché tuvo la más clara, con una gran xugada de Javi Muñoz que-y punxo’l pase perfectu al desmarque, pero que l’ariete remataba n’área pequeña atopándose con Juan Carlos. La penúltima foi de Bárcenas, rematando a pase de Toché y volviendo a estrellase contra’l meta local. Aarón Ñiguez afrelló en llargueru un llanzamientu directu de falta, y Edu Cortina remató la postrera tamién ensin suerte.
Finalmente trés puntos que marchen pa Uviéu con un millar d’uviedistes felices depués de ver ganar al so equipu en Lugo. El próximu entrenamientu va ser mañana, llunes, a les 10:30 hores n’El Requexón.
