Los precedentes titulaben Santo Domingo como un campu contrario para'l Real Oviedo que nunca llograra ganar en territoriu alfareru. Pero dalguna vegada tenía que ser la primera y l'equipu de Javi Rozada demostrólo en pocu más de 15 minutos.
Nel minutu 13 y con revisión de VAR incluyida, subía al marcador un gol de Borja Sánchez que metía de llenu al Real Oviedo nel partíu. Dos minutos dempués yera Yoel Bárcenas quien ampliaba ventaya, col cero a dos, a pase de Ortuño, poniendo bien de cara l'alcuentru para los de Rozada . L'ex oviedista Boateng retayó distancies col unu a dos, y el conxuntu carbayón defendióse bien hasta'l descansu, con un Alcorcón buscando l'empate.
Afixó'l técnicu oviedista al descansu y na segunda metá'l Real Oviedo llogró anular a los locales. Ensin demasiaos acercamientos con peligru n'ataque, pero ensin conceder tampoco al conxuntu alfareru, los oviedistas intentáronlo con espacios a la contra, y foi Yoel Bárcenas quien sentenciaba col unu a trés definitivu nun gran gol, con asistencia de Juanjo Nieto. Victoria y allegría inmenso para'l mediu millar d'aficionaos oviedistas presentes nes graes de Santu Domingo.
