L’oxetivu yera siguir con vida, y los trés puntos dexen que’l domingu que vien en Llión se dispute otra final.
El Real Uviéu ganó énte un Sevilla Atléticu descendíu, que compitió como si entá lluchare por oxetivos y énte’l que pudo sentenciar na primer parte. L’un a cero llegó cuando entá nun s’algamaren los cinco primeros minutos de partíu. Ramón Folch, nun refugue, disparó raso cola derecha y coló’l gol apegáu al palu. Adelantábase’l conxuntu uviedista bien llueu, pero siguía asediando la meta de Soriano. Primero con un remate en llanzamientu de córner, qu’atayó’l meta sevillista. Depués con un disparu d’Aarón, al refugue, que marchó raspiando’l poste. Linares tuvo dos clares, pero na primera volvió atopase col porteru del filial del Sevilla, y na segunda remató alto, de cabeza, percima del llargueru. Volvió intentalo Aarón, con una internada dende la derecha, que volvió atopase col espeye de Sorianu, que sacaba una mano providencial pa tornar lo xusto un derechazu potente de Rocha, que s’afrelló na trabanca. Con un resultáu demasiao curtiu pal dominiu uviedista tan claru, llegóse al descansu.
Na segunda reaccionó’l Sevilla Atlético, qu’aumentó la posesión y les llegaes nos primeros compases del partíu. Christian Fernández marcaba’l segundu pa los azules, nun centru de Saúl dende la esquierda, que remataba de cabeza n’área pequeña’l defensa cántabru. Cuando paecía que’l partíu taba cuasimente sentenciáu, un gol en propia volvía da-y vida al filial sevillista, y al Real Uviéu tocó-y sufrir hasta’l final. Johannesson tuvo la más clara, nuna contra que remató dende la derecha, pero marchó alta.
A la fin, los trés puntos quedaron nel Tartiere, y el Real Uviéu sigue lluchando por un puestu de play off d’ascensu.
