El Real Uviéu precisaba volver ganar en casa y fíxolo énte l’únicu equipu del fútbol profesional español que nun conocía la derrota.
Anquela apostó por un cambéu de sistema, y la titularidá de Javi Hernández del Vetusta, énte un Albacete que llegaba invictu al Tartiere. Los cambeos y l’aumentu d’intensidá nos primeros minutos del partíu funcionaron a la perfección, y el Real Uviéu dominó dende’l primer momentu l’alcuentru. Les ocasiones llegaron de botes de Tejera, con un disparu mordíu dende la frontera qu’atrapó Nadal. El siguiente remate foi de Joselu, que tocó n’área pero unvió la defensa a córner. Y entós llegaba’l gol. Ramón Folch emburriaba nel segundu palu p’anotar el qu’a lo postrero diba ser l’únicu gol del partíu. La sensación de superioridá uviedista yera total, y l’emburrie n’ataque nun rebaxaba la so intensidá, ensin averamientos del Albacete, pero con una única ocasión clara de remate pal Real Uviéu, nel llanzamientu directu de falta de Bárcenas que volvió acabar en córner.
Na segunda metá l’emburrie inicial volvió ser de los d’Anquela y, depués de dellos averamientos, la ocasión más clara foi de Joselu, rematando en carrera un centru dende la esquierda, que volvió atayar Nadal. El Real Uviéu empezó entós a aplicase en defensa, con un Albacete que gastaba toles bales n’ataque y espurríase en busca del empate. Dalguna llegada a la contra, y una ocasión de Joselu que nun vio portería, por más llegaes qu’ocasiones de los de Ramis. El Tartiere animó hasta’l final.
La primer victoria de la temporada nel municipal uviedín, pa volver mañana a los entrenamientos a les 10:30 hores n’El Requexón.
