El Real Uviéu precisaba ganar, y aguardar. Ganó, y aguardó. Pero la fortuna, nesti casu, dixo adiós por un solu gol. El que se precisaba en Los Pajaritos pa que’l conxuntu uviedista se metiere na sesta plaza, qu’a la fin foi pal Numancia, empatáu a 65 puntos col Real Uviéu, gracies al golaveraxe.
Empezó’l partíu con ocasiones pa dambos equipos. El Real Uviéu tenía’l control del balón,y averóse a la meta del Huesca nun remate de cabeza de Linares, en saque d’esquina, que nun atopó portería. Alfonso intervieno pa tornar un remate de Cucho que buscaba’l segundu palu, y Aarón volvió intentalo con un remate qu’atayó’l meta oscense. Llegaba con criteriu’l Real Uviéu y tenía ocasiones, hasta qu’un gran pase de Rocha dexó a Johannesson una xugada perfecta pa executar un gran remate y anotar el primer gol del partíu. Poco depués llegaba un penalti sobre Mossa, que Santamaría aparó-y a Llinares. Al refugue, el capitán remataba, estrellándose contra’l llargueru. Llegóse al descansu col un a cero en marcador.
Na segunda metá, el Huesca buscaba l’empate con más fuercia, y el Real Uviéu aguantó los ataques del equipu de Rubí, yá de Primer División. Endureció’l partíu nos primeros compases de la segunda metá, hasta qu’a lo último, nel minutu 72, Miguel Linares anotaba’l segundu gol del partíu. El Huesca recortaba distancies, col 2-1, pero’l Tartiere yá sabía que, sacante un gol de la Cultural, el play off diba escapar pol golaveraxe.
A la fin, el Carlos Tartiere despidió con arguyu al so equipu. A los sos xugadores, y al so entrenador. Hasta la temporada que vien.
