La xornada 23 en LaLiga Smartbank dexó nel NMR Carlos Tartiere un Real Oviedo– Albacete para abrir la tarde de fútbol nesti últimu sábadu de xineru, que sirvió para homenaxar a Pablo Cortijo, fiel siguidor azul apocayá fallecíu.
Cola presencia de Bingen Arostegi al frente del banquín carbayón, supliendo l'ausencia de Ziganda que s'atopa aislláu na so casa por un contactu estrechu, los azules punxeron en tema un once bien similar al de la pasada fin de selmana en Las Gaunas, coles úniques novedaes de Grippo y Tejera, para encarar un choque al que los azules entraron bien, pero que l'Albacete llevóse nel segundu tiempu con un gol a balón paráu.
Na primer metá, onde'l Real Oviedo dispunxo del control del xuegu, los de la capital del Principáu amosaron el so orde defensivu, esfrutando de delles llegaes a la área, que nun llograron materializar.
Tres el pasu por vestuarios, los azules volvieron entrar meyor al partíu, recuperando balón en campu contrario y aprovechando centros llaterales. El xuegu del Albacete, metíu nel so campu, pasaba por buscar balones llargos a la contra para amedranar a la defensa carbayona. Nun balón paráu, los manchegos adelantáronse nel marcador. Tres el tanto, el Real Oviedo entornóse enriba, pero ensin apenes ocasiones para superar la portería defendida por Tomeu Nadal. El choque acabó con un palu de Borja Valle tres un llanzamientu de falta.
Los azules van volver al trabayu mañana para preparar el próximu partíu énte'l Cartaxena, el sábadu, 6 de febreru, a les 16:00 hores nel Municipal de Cartagonova.
