Trés puntos que premien el trabayu y la fe. Y el nunca dexar de creyer. El Real Uviéu marchó del Martínez Valero con una victoria valiosa qu’asitia momentáneamente l’equipu en puestos de play off d’ascensu.
Cola entrada directamente n’once de Saúl Berjón pol sancionáu Yoel Bárcenas, de les sos botes foi’l primer disparu que marchó a córner. La primera clara foi de Joselu, que disparó cruciao a pase de Saúl y marchó fuera. El Real Uviéu entró bien al partíu y nun foi la so única llegada. Christian Fernández tenía, de cabeza, otra ocasión clara en llanzamientu de falta. Ensin goles algamóse’l descansu, con un gran despliegue físicu de los uviedistes, que caltuvieron la seriedá tol tiempu.
Na segunda, el cambéu de Javi Hernández, con un golpe fuerte nel todíu, y la entrada de Javi Muñoz nel so sitiu supunxo un cambéu nel sistema. Con defensa de cuatro y trés centrocampistes llegaba otra ocasión clara de Joselu. Llegaba en carrera al área, pero remató demasiao cruciao y marchó fuera. Poco depués, nel 53, yera precisamente Joselu quien firmaba’l cero a un en marcador. Tuvo’l cero a dos Saúl, nuna ocasión clara que tuvo pa xutar a placer y esvióse lo xusto tocando nun defensa pa qu’atrapare Edgar Badía. Nuna xugada con abonda mala suerte, a disparu de Nino tocaba en Carlos Hernández y acababa nel empate del Elche. Corría’l minutu 70 de partíu. Entraba Toché por Saúl Berjón, y l’ariete murcianu tenía una oportunidá, unviando alto’l so remate de cabeza en llanzamientu de córner. Probó tamién Johannesson y atopóse col porteru local. Entró Ibra por Joselu, y remató al palu un córner qu’acabó en mano d’un defensa local, y en gol de penalti de Toché. Yera l’un a dos, nel añedíu, y asina acababa’l partíu, con una victoria qu’allarga la racha tan positiva del conxuntu de Juan Antonio Anquela.
L’equipu va volver mañana a Asturies y vuelve a los entrenamientos el llunes a les 17:00 hores n’El Requexón.
