Un derby, seya na situación que seya, siempre ye un derby. Y el Real Uviéu tuvo a l’altura y la so afición, percima del sobresaliente. Depués del gran ambiente vivíu na previa del partíu, con pasillu de l’afición al autobús del equipu dende l’hotel hasta l’estadiu, y depués nun Carlos Tartiere que retumbó de principiu a fin.
Anquela apostó por dos cambeos n’once, cola entrada de Javi Hernández y Mossa, y la vuelta de Saúl Berjón recuperáu. Duráron-y les fuercies la cuenta: cuarenta y cinco minutos pa dexar el partíu empobináu pal so equipu. Y llueu se punxo de cara pa los azules, más azules que nunca. Ibra anotaba cuasimente de chilena, axustao al palu, un balón qu’atrapó al refugue y punxo pates arriba l’estadiu. Siguió’l guión, l’emburrie, y la llegada del Real Uviéu. Y llegó’l segundu, obra d’Alanís, en xugada a balón paráu botada por Saúl Berjón pa que cabeciare batiendo a Mariño. El dos a cero daba un respiru al equipu d’Anquela, que se defendió ensin apuros hasta’l descansu.
Na segunda metá, y cola entrada de Johannesson por Saúl, el Real Uviéu tentó de caltener la intensidá, pero’l Sporting tuvo unos bonos minutos que’l conxuntu uviedista supo aguantar. Llegó la xugada del penalti a favor del equipu xixonés, y Carmona ponía’l dos a un dende los once metros. El Real Uviéu nun se descompunxo y tuvo el trés a un nun cabecéu perfectu de Johanneson que Mariño sacó con una gran espurrida.
Y llegó’l final, el Tartiere volvió festexar, y el Real Uviéu marchó cola so xente, a disfrutar. Namás hasta l’entrenamientu que vien, el martes a les 18:00 hores n’El Requexón.
