El Real Oviedo tenía que ganar pa siguir con opciones de puxar pol play off nos tres partíos que queden hasta’l final de temporada.
Fízolo nuna tardi con un namás cambiu nel once con respectu al de la otra xornada en Málaga. Viti entraba na banda derecha, en cuenta de Bárcenas, y anque los azules salieron más enchufaos al partíu, la primer metá foi de muncha disputa ente los dos equipos y pocos acercamientos a puerta. El CD Numancia, que llegaba al Tartiere coles mires d'averase a la permanencia, foi ganando presencia nel xuegu aeriu col pasu de los minutos. Nel entamu del alcuentru Ibra remató al llateral de la rede; Viti punxo un centru rasu que despeyó la defensa a córner, y Christian Fernández punxo otru que nun atopó rematador. La más clara de la primer parte túvola Tejera nún llanzamientu de falta directu, que paró Juan Carlos abaxo.
Na segunda metá'l tempraneru gol de Carlos Hernández, rematando nel segundu palu un balón mal sacáu de Villalba, dio-y puxu al Real Oviedo. El conxuntu oviedista aumentó la so presencia n'ataque, y ameyoró’l xuegu. Egea ximielgó’l banquín dando entrada a Yoel Bárcenas, y l'equipu azul tuvo les meyores opciones en contres que nun fue a sentenciar. Dos tiros dende la frontera de Saúl que marcharon esviaos, un remate de cabeza de Mossa que llegaba en carrera nel segundu palu y qu'atrapó Juan Carlos; y delles xugaes a balón paráu que nun atoparon premiu.
Finalmente los tres puntos quedaron nel Carlos Tartiere pa preparar el partíu viniente énte'l CD Tenerife coles mires de sumar otros tres puntos pa siguir na llucha polos 69 que dean opción a xugar play off.
AST
