El Toralín acoyó esta tarde la cuarta y última cita de pretemporada pa los de Ziganda, segundu partíu como visitantes tres el primera amistosu apostáu en Balaídos, y que nesti casu enfrentó al conxuntu de Ziganda contra la SD Ponferradina, nel que'l porteru Brazâo debutó como titular.
Precisamente col porteru brasileñu baxu palos, formó'l técnicu oviedista l'once inicial con Johannesson, Ugarte, Christian Fernández, Lucas, Edu Cortina, Jimmy, Riki, Ton Ripoll, Cedric y Mujica. De mariellu "sacavera" el conxuntu oviedista caltuvo nos primeres compases del alcuentru la personalidá de los alcuentros de preparación apostaos enantes, con bona presión y esplegue de trabayu, ensin pasar apuros en defensa y con verticalidá anque ensin aciertu nes llegaes n'ataque. El tramu final de la primer metá foi de mayor dominiu de la Ponferradina, pero la seriedá defensiva del conxuntu oviedista dexó llegar al descansu col marcador ensin goles para nengunu de dambos conxuntos.
Tres el pasu por vestuarios, Ziganda enfrescó l'ataque dando entrada a Rodri, que -y dió una marcha más nes llegaes en velocidá al equipu de Ziganda. El gol llegaría nuna acción individual de Riki, tres una bona conducción y gran golpeo cruciáu cola pierna derecha dende la frontera del área. Javi Cueto y Vanderson entraron dende'l banquín con media hora per delantre, y unos minutos más tarde Edgar y Viti. Tres un penalty por agarrón na área que Yuri estrelló nel llargueru, el Real Oviedo dispunxo de dalguna llegada más, pero finalmente ensin más goles, nel últimu ensayu de la pretemporada oviedista.
Con esta victoria conclúi la etapa de preparación previa a competición para l'equipu de José Ángel Ziganda, que va esfrutar de descansu hasta'l martes pela tarde, col regresu a los entrenamientos preparando yá'l so debú en competición oficial, el próximu domingu a les 12:00 hores nel NMR Carlos Tartiere frente al Cartagena EFS, na xornada 1 de La Liga Smartbank.
